2Cor 4 | YML | STEP | Yaubada ma yana nuakalikali i venua'ivinema 'a vetolau'age Iesu Valana 'Atumaina faifaina, begaidi tutuyanina vita tulina tulina 'a veluagadi kebu 'a da baila.

2 Corinthians 4

Yaubada 'ana 'aseta 'waideye bani'odi 'ai'aiwabu.

1 Yaubada ma yana nuakalikali i venua'ivinema 'a vetolau'age Iesu Valana 'Atumaina faifaina, begaidi tutuyanina vita tulina tulina 'a veluagadi kebu 'a da baila. 2 We'e mogitana sauluva givagivadi wata 'eba bunumayaga 'a bailedi. Kebu tomotoga 'a da vekaliedi 'aseta-vekavekali 'waidiega wata Yaubada yana Vona kebu 'a da 'ivesakoi bega ve tulina 'wainega tomotoga nuadi 'a da 'ani'anidi. Mogitana Yaubada mataneye yana nuanua tonovidi 'a kikiavemagetadi tomotoga 'waidie bega 'adi vebae 'waidie i lutonovi yama ve vona mogitana. 3 Iesu Valana 'Atumaina 'a lulu'ageyeniga mogitana givagivana tomotoga 'ifwaidi 'waidie, tomotoganidi wafaotoga 'ana 'eda 'waineamo i nunagoi, 'aisedi kebu 'adi fata i na 'asetai. 4 Seitani, kumanina fwayafwaya 'ana yaubada sakoina, nuadi i 'ivetabodadi bega kebu i da vetumagana wata Vala 'Atumaina yana mageta kebu 'adi fata i na 'isa'inanai. Valanina, Keliso yana 'ai'aiwabu wata yana mageta mataududulina i sivemagesedi, We'e Kelisonina taunina mogitana Yaubada bani'odi. 5 'Wa 'iseni, 'ima kebu taunima 'ama subia faifaina 'a da lalau'age, we'e mogitana Iesu Keliso faifaina 'a lalau'age 'a vo, Taunina 'ada Toveimea, we'e 'ima 'a vetofolovaga 'waimie taunina faifaina.” 6 'A vetofolovaga wata 'a lalau'agega fai Yaubada nuama i kiavemagetadi. Basenadiotoga dudubala'ava, bega Yaubada i vo, Mageta i na souyeni dudubala 'wainega,” nika mogitana i magetai. Wata bani'odi Yaubadanina nuama i kiavemagetadi yana mageta 'wainega bega yana 'ai'aiwabu magemagetana 'a 'iseni Iesu Keliso maigina 'waineye. Yaubada yana 'ai'aiwabunina 'ana 'aseta 'waimeye bani'odi mageta.

7 Wata yana 'ai'aiwabunina mataududulina 'ana 'aseta 'waimeye 'asa'aiana 'ama 'uyua. 'Ima mweama tomogoma bani'odi nau siwe 'ai'aiwabunina i dodogidi 'waimeye bega mali tomotoga i na 'isema i na 'asetai yama toketokena 'a veluagai Yaubada 'wainega kebu taunima 'waimega. Toketokenanina bwaikaotogina, kebu 'ifwaidi bani'odiga. 8 Vita tulina tulina 'a veveluagadi siwe kebu 'a da 'awakuakualima, vitanidi faifaidi 'a vekoi siwe kebu yama vetumagana i da mwea. 9 Keliso 'ana gaviavo i nikenikema siwe kebu Yaubada i da bailemaga, 'eba ilagi bwaikidi 'a veveluagadi siwe kebu 'a da wafa. 10 Basenadi Iesu 'ana gaviavo 'waidiega vita wata veviga i veveluagadi, mulieta i luvewafai. 'Ima wata bani'odi vita 'a veveluagadi Iesu Valana faifaina, igodi nuanuadi tomogoma i da luluvewafadi siwe vitanidi 'waidiega tomotoga fuedi i 'asetai Iesu mia 'ivauna wata 'atumaina 'adi to'anivelena. 11 Yama mia matatabuna 'waidie 'eba wafa 'a veveluagadi Iesu faifaina. Igodi bei 'a da wafawafa siwe ma yawaima bega tomotoga 'ifwaidi tomogoma 'a'a'avidi i na 'isedi i na 'asetai Iesu miamia-vagaina tomogomeye i miamia. 12 'Ana 'aseta side bani'odi. Fai 'a lalau'age Iesu Keliso faifaina 'ana gaviavo vita i velevelema igodi nuanuadi i da luluvewafama, we'e 'omi yama lau'age 'waidiega Keliso Valana 'wa nogai, mia 'atumaina wata miamia-vagaina 'wa veveluagai.

13 Tamu vona i 'eno'eno Yaubada yana Buki nageneye i vo,

A vetumagana Yaubada 'waineye, begaidi a voneyeni.”

'Ima wata bani'odi 'a vetumagana begaidi yana vona 'a veveifufuyeni. 14 Yaubada, kumanina 'ada Toveimea Iesu i sivetovoia wafayega, 'a 'asetai wata i na sivetovoima Iesu taiadi. Wata bani'odi 'omi i na sivetovoimi, 'omi wata 'ima taiadi i na vagavaida ta na nagoi mataneye. 15 'Ama vitanidi matatabuna 'a veluagadi fai Iesu Valana 'Atumaina 'a lalau'age, siwe fai 'wa vetumagana Valanina 'waineye 'aivaita 'wa veluagai. Valanina i nunago tomotoga fuedi 'waidie Yaubada yana nuakalikali i veveluagai nika tovetumagana 'ada 'aila'a i vevefue. I vevefuega nika yada vekaiwa Yaubada 'ana subia i toke i vevebwaika-'afo'afo.

S2 1 Tes 2:5S4 Efe 2:2S6 Nag 1:3 1 Fit 2:9S11 Lom 8:36
S14 Lom 8:11 1 Tes 4:14

'Ai'aiwabunidi 'awaie ta na veluagadiga vita i vebwaika-'iawedi.

16 Fai 'awaie Yaubada i na sivetovoida Iesu taiadi, bega kebu 'a da vo, 'A baila.” Tomogoma yadi toketokena i mweamwea i na nagoga nika i na 'a'ava, we'e 'aiata 'aitamogana 'aitamogana 'anu'anunuma i 'i'ive'ivaudi. 17 Vitanidi 'a veveluagadi nani siaina 'awaie i na 'a'ava, siwe 'waidiega 'ai'aiwabu magemagetana wata miamia-vagaina 'a na veluagadi, 'ai'aiwabunidi bwaikaotogidi, kebu bani'odi 'ama vita. 18 Begaidi naninidi 'a veveluagadi fwayefwayeye 'a 'isamata'aliliedi, we'e naninidi kebu ta da 'ise'isediga faifaidi 'a nuanua. Naninidi ta 'ise'isediga 'a'a'avidi 'awaie i na 'a'ava, we'e naninidi kebu ta da 'ise'isediga i na 'eno-vagata.

S17 Lom 8:17-18S18 Ibu 11:1-3